Prishtina e ka fituar kryendeshjen e stinorit ndaj Feronikelit (1:0) dhe tashmë e kryeson renditjen me 33 pikë, një më shumë se skuadra nga Drenasi.

Megjithatë, trajneri i Prishtinës, Mirel Josa, fitoren e sotme e vlerëson të rëndësishme po aq sa edhe ato në ndeshjet tjera.

“Nuk mund të them se ishte fitorja më e rëndësishme, sepse të gjitha janë të tilla. Rëndësi ka vazhdimësia që po e tregojnë futbollistët dhe përgjigja e tyre për këtë ndeshje derbi”, ka thënë Josa për Super Sport Kosova.Sa i përket lojës, ai ka theksuar se skuadra u paraqit mirë, por ka pasur edhe momente të mund t’i kushtonin.

“Në pjesën e parë ishim më të vendosur.  Në të dytën ia dolëm të shënojmë, por duhej të ishim më të kujdesshëm kur e kishim topin në pronësi, pasi në këtë mënyrë do të fitonim më tepër kohë dhe nuk do ta lejonim rivalin të krijonte raste. Pastaj, me largimin e Miftarajt me karton të kuq, paksa u prishën ekuilibrat. Sidoqoftë, kështu e ka futbolli, kemi humbur edhe ne ndeshje në këtë mënyrë.

Feronikeli ka futbollistë shumë cilësorë dhe e dinim se do të jetë ndeshje e fortë. Tani na duhet të përqendrohemi për ndeshjen me Ballkanin”, ka shtuar Josa.